कञ्चनपुर,
कञ्चनपुरमा प्रहरीले २९ ग्राम ८८० मिलिग्राम खैरो हेरोइनसहित ६ जनालाई पक्राउ गरेको छ। बिहीबार राति इलाका प्रहरी कार्यालय बेलडाँडी र प्रहरी चौकी भुडाबाट खटिएको संयुक्त टोलीले भारतबाट नेपालतर्फ आउँदै गरेका व्यक्तिहरूमाथि शंका लागेर चेकजाँच गर्दा लागूऔषध बरामद गरेको हो।
पहिलो घटनामा डडेल्धुराको अमरगढी नगरपालिका–१ का २५ वर्षीय यादब तमौली र बागबजारका १८ वर्षीय एक किशोरलाई १४ ग्राम ७२० मिलिग्राम खैरो हेरोइनसहित पक्राउ गरिएको प्रहरीले जनाएको छ। उनीहरू सवार से ७ प २०९९ नम्बरको मोटरसाइकलसमेत नियन्त्रणमा लिइएको छ।
त्यस्तै, सोही क्षेत्रमा गरिएको अर्को कारबाहीमा १५ ग्राम १६० मिलिग्राम खैरो हेरोइनसहित थप चार जना पक्राउ परेका छन्। पक्राउ पर्नेमा कञ्चनपुर शुक्लाफाँटा नगरपालिका–११ का २६ वर्षीय हिक्मत बोहरा, कृष्णपुर नगरपालिका–५ का २४ वर्षीय दिपेन्द्र बिष्ट, कैलाली गोदावरी नगरपालिका–३ का २७ वर्षीय सुरेन्द्र साँउद र दार्चुला शैल्यशिखर नगरपालिका–६ का २८ वर्षीय जनक सिंह धामी रहेका छन्। उनीहरू सवार सुदूरपश्चिम प्रदेश ०२–००१ ज ६३० नम्बरको विद्युतीय हाइससमेत प्रहरीले नियन्त्रणमा लिएको छ।
बरामद लागूऔषध र सवारी साधनसहित सबैलाई नियन्त्रणमा लिएर थप अनुसन्धान भइरहेको प्रहरीले जनाएको छ।
